Ifølge ei undersøking franske forskarar har gjort, er sjansen for at smitte spreier seg mellom fysioterapeutar og pasientar langt større enn når det gjeldt leger og sjukepleiarar.

På Sørlandsparken Kiropraktorsenter, er dei ikkje sikre på om dei treng å vaksinere seg mot svineinfluensaen.

- Synest du de burde få tilbod om vaksinering?

- Ja, det hadde kanskje vore naturleg, i og med at me er autorisert helsepersonell, seier kiropraktor Welhaven Løchen på senteret.

Men han er ikkje redd for å smitte pasientane.

- Viss eg blir sjuk, er eg ikkje på jobb, seier han.

Ikkje intensivert rutinene

Kiropraktorane har gode rutiner med desinfisering, som alltid har vore på plass.

- Me rensar benkene og vaskar hendene godt heile tida, forklarar Welhaven Løchen.

Pasienten Thao Pham meiner også dei burde fått tilbod om vaksine.

- Det ville vore naturleg, men eigentleg har eg ikkje tenkt så mykje over det, seier han.

Superspreiarar

Basert på kven som har kontakt med flest pasientar, og kor ofte, reknar dei franske forskarane seg fram til gruppa dei kallar ”superspreiarar” blant personalet på eit sjukehus, skriv forskning.no.

Forskingsresultata vart nyleg publisert i tidsskriftet Proceedings of the National Academy of Sciences.

Prioriterer alt helsepersonell

Kommuneoverlege Vegard Vige seier kiropraktorar og fysioterapeutar er ei klar prioritering.

- Dei er jo i høg grad i nærkontakt med pasientane. Det er heit openbart at dei skal få tilbod om vaksine, seier han.

Alt helsepersonell skal altså få tilbodet, men arbeidet er heilt i startgropa.

- Når me får vaksiner neste veke, vil me kome i gang med dette, seier Vige.

Så framt han finn fram til alle.

- Helsepersonell må gjerne sende inn bestillingar, legg han til.