[img8930_2RS]

3000 meter over havet utanfor hovudstaden Addis Abeba, ligg Entoto Training Center. Her bur fleire titals hundar med norske namn. Dei ligg i hardtrening for å kunne rydde Etiopia for miner. Innan 2015 skal det ikkje vere ei mine att i landet. Det er målet til leiaren på senteret, Nedim Feizic.

- Arbeidet er veldig meiningsfullt. Hundane har eit enormt press på seg. Likevel har dei eit godt liv her, fortel han.

Utfordrande

Plasseringa av minehundsenteret på Entoto-høgda, er bevisst. På 3000 meters høgde blir både luft og luktar tynna ut. Trening i dette miljøet, gjer snutene svært skjerpa og hundane topptrente. Og dei norske kommandoorda, lærer dei fort å lyde.

- Søk! Seier hundetrenaren. Han har med seg Oda inn i karusellrommet. Her er det 20 beholdarar festa på armar ut frå karusellen, plassert i hundehøgde. I ein av beholdarane skjuler det segt ein liten bit med TNT. I dei andre er det plassert forskjellige ting med sterke luktar, for å gjere søket vanskelegare. Oda har ingen peiling på kvar det ho skal finne ligg – bitane ligg aldri på same plass.

Feilfritt

Den belgiske fårehunden er fullt konsentrert om arbeidsoppgåva ho har fått. Med øyra på stilk og skarp nase, går ho raskt frå beholdar til beholdar, utan å nøle. Ho tek nesten ein heil runde rundt karusellen, før ho stoppar bestemt ved beholdar nummer 18, set seg ned, og ser spent opp på trenaren.

[img8930_3LM]

Hunden skjønar fort at ho har gjort ein god jobb når ei gummileike i ein tråd kjem opp frå lomma til trenaren, noko ho tydeleg set stor pris på.

- Det er veldig viktig at arbeidet blir løna med mykje leik og kos, fortel Nedim Feizic.

- Hundane er under eit enormt press under treninga her på senteret.

Ingen døde

I tillegg til karuselltrening, leitar hundane i fleire typar terreng og underlag etter sprengstoff. Også i bilar og mellom mursteinar, finn dei bitar med TNT.

Etter fullført treningsopphald, blir hundane utplassert til mellom anna grenseområda til Eritrea og Somalia for å rydde borgarkrigsminer.

- Framgangen har gått betre enn venta. Eg er veldig stolt av jobben min, og glad for at prosjektet går så bra som det gjer, fortel Feizic. Enno har ingen hundar blitt drept i arbeidet med minerydding.

[slideshow id=21]